By: Rev. Dr. Go Van Mung
2020 May 30 ni Nashville, TN panin meeltheihte tawh Pensacola Beach ka pai uhleh tui na sianglo citciat hi. Nungkalsung ka pai un tuisiang mahmah hi. Pensacola pan Panama City dung pen "tuisiang hi" ci-in minthang hi. "Banghang tuinin aitam," ka kici uh a, "zan mah in huihleguah zu hi ve'n maw" cih ka phawk uh hi.
Khatvei Our Planet a kici TV program khat ka etleh, "tuipi tungah huihpi hat mahmahte a om takciang tuipi ki-hual in, tuipi kilok a, tua panin tuipi sungah na thak tampi piang hi," ci-in scientists te'n gen uh hi. "A diakdiak in, tuipi sungah a om ganhingte a dingin an thak tampi piang hi," ci uh hi.
Israel mite San Tuipi a kan ding uh ciangin Jehovah Pasian in zan tawntung huihpi hat nung sak hi (Paikhiatna 14:21). Tua huihpi hat pen San Tuipi tung bekah nung cihbang om thei lo-a, tuipi gei ah giahphualsat Israel-te'n zong zanhak mah in thuak ding uh hi (Paikhiatna 14:2). Pharaoh galkapte zong gamlalo, ci ahihteh, amau zong thuak ngel ding uh hi (Paikhiatna 14:10).
"Khristiante'n Pasian theihloh (phalna omlo in) in a piang om kei" i cih mah bangin huihpi a nungsak Pasian hi a, tuipi a lok Pasian hi a, San Tuipi khen2 asuah zong Pasian mah ahi hi. Tu laitak Covid19 hitaleh gamvai buaina huihpite in hong nawk laitak ahi hi. Tua mah bangin huihpi tuamtuamte Pawlpisung, innkuansung, mimal nuntakna ah a nun laitak zong hi kha ding hi. Tua huihpite a hun a cin takteh hong dai ding a, Pasian nalamdang bawlte, Pasian' khutma a thak tampite i mu ding hi.
Thungetna: Na khempeuh tungah thunei a Vanglian Topa Pasian aw, na nasempa Moses in "Galdona in TOPA a hi; kiptak in om un," a cih mah bangin mangbat-huai hunte sungah Na nasepna lamdangte hong mu sak in. Amen.
0 comments:
Post a Comment