GULPI AI LEH THIAN ZA MUNG

GULPI AI LEH THIAN ZA MUNG

Pu Thian Za Mung te innkuan pen Chin State Chawhte khua ah teng uh a, 2008 kum a thupiang ahihi.

Nikhat Pu Thian Za Mung pen a tapa tawh saphu leh sakuh beng in gamvak uhhi. Saphu paina zong dingin kikhen uh in mun khat tuak ah pai uhhi. Sau paiman nailo in kawm sung khat ah sakhi tal khat ling kalkal a ding Pu Mung in mu hi. Pu Mung in a temtawng lakhia in a sakhi gem/khum khiankhian in sat a sawm leh thampi khat tawh kibing muh vat hi.

Pu Mung in zong thampi aikaihsa hi ei, bangmah cih kei ning ci-in a nungkik leh thakhat in thampi in bawhpai in zialnelh a, a khanglam ah thampi tawh kikhuk suk khawm hi. Pu Mung in a temtawng tawh thampi lutang a sat leh thampi zong zaw pah in khahkol zaw deuh hi.

Pu Mung tapa in a pate thawm a zak ciangin thakhatin delh pah a,a pa tawh thampi vat huan in that uh a, tong 15 tak sau hi. A pata un a khanglam ah kai suk in luipang ah a sa sem dingin kithawi in pu Mung in temtawng tawh a ngawng a tan leh huihpi nung kipan pah hi. Huihpi nung nasia mahmah sung in a gulpi ngawng kitansa dak ngakngak kik a, a pa ta un sattuk kik thei uhhi.

Pu Mung in a gilkhei ding a kipat leh a kimah mihonpi ding tawh kibangin khuasik mul tho in a tapa lau mahmah hi. A tapa ciah mengmeng ding ut a, a pa in thamsa leh asinkha ciahpih ding bekbek ngaihsun hi. Thampi gilpi a tem tawh kuikek in a phen leh suang manpha nih la khia in a gei a suang tungah koih hi. Tua khit ciangin letmat guk a sau khepi cia cia suai tawn 6 zong mu hi. Suang tung a koih suang manpha lak a sawm leh kuaman a la lah hi lo in mang a, a kim a pam a zonzon uh hangin mu zo nawn mahmah lo uhhi.

Amau zong kinawh thawi mahmah uh a, a sa leh a sinkha te la in a puakhop tuak tawh ciah uhhi. Lam a pai uh leh muhtheihloh a zui om tawh kibangin a nunghei vat uh hangin bangmah lah mutuan lo uhhi. Thakhat thu in ping kipei vat in a tapa kipumpaih hi. A banglo kal sunghiam in a suaitawn te uh man cihtak in mang leuleu hi. A upmawhna teng a pumzon uh hangin mu zo mahmah lo uh a, a tapa in hibang thu thei ngei keng, a sa teng zong paigai ni a cih leh a pa in a sa te pailo e, pai mengmeng zaw ni, a ci hi.

Pu Mung te pata vaitung pen a thei masa sa in delh ngeingai uh a, pu Mung in a tuah khempeuh abanban in gen gai hi. Thampi sinkha pen vuttui koihna um sungah koih in hoih takin sincip uhhi.

Zan ciangin pu Mung in mang lamdang mahmah khat man hi. A mang in a tapa tawh gamsung ah a om laitak un, loudspeaker tawh mi awng awng a, Thian Za Mung te pata man dinghi hang, a ci hi. Tua khit ciangin galkap nih in ka kumpi nu uh na thah manun kong man uhhi ci-in man uh a, thongsung ah a koih sawm laitak in galkap mang khat pai in galkap khatpa thatlum pah in a khat pen kha 4 sung thongkia dingin ci zawsop hi. Tua khit ciangin khanglo hi. Zingsang a thawh uh ciangin thamsinkha a et uh leh a koihna a sin kihong lo na pi in mang leuleu hi.

Thampi a thahzawh ninih ni akipanin pu Mungte pata a ci uh na gawp in lumcip uhhi. Zawlsei khua a thungen thei khat a zot uhhangin phatuam tuanlo uhhi. A ganno te uh, leh a sakol te uh zuak in Kawlpi zato zuan uh a, bangmah nuamtuam tuanlo uhhi. Kawlpi a bumleh siam Phung Tin a lehsak uh hangin kilamdang tuan lo hi. Laitui khua a a sakol leipa uh pu Khan Za Khup in dawite thong ah a kia hi uh ciai, mi na zotzot uh a, na kibawlbawl hang un dam tuan kei nuteh, lah sihpih tuan kei nuteh, a ni a cin ciang dam lel nuteh, a cih ciangin pu Khup thugen um uh a, tua bangin om uhhi. Pu Khup gen mahbangin thampi a thah zawh uh kha 4 a cinni in dam cihtak in dam siang sitset uhhi. Tua akipan in pu Mung in gamlak ah thampi a muh zel hangin thah dingin ngaihsun nawnlo hi.

Source by : Methodist Chanchinbu "Hriatna Robawm" 2009