UKPITE LEH ZOMI NAMNI
(By. Zaa Khai Sukte)
A munmun ah Zomi namni ong pian khiat na thu kigen aa ih zakim tek hi.
Zomi namni tawh kisai in Makai te genteng leh lai aa ki at teng tawh lungkim suk pah lo in maan maw maan lo khangthak ten kantel leng hoih kasa hi. ( Mi masa Makaai masa te leh tulai tak makaai pawlkhat thugen te ka et teh, Beh lungsim neih na, Uk Pi te El na, langpan na leh gen siat nop na lungsim nei uh a hihman un, Thumaan taktak thei napi un gen nuamlo uh hi).
Zomi namni ongpian khiat na thu a kigen ciang leh a kibawl sim in Falam a mipi ki muh tuah, ki muhkhop napan Uk Pi te thuneih Uk na zaa abei ni,Siahtung Siahphei bei ni leh Mipi te suah taak ni ci in kigen den a hih man in hih lai mun ah Makai te tung ah dothuai thu tampi om kasa hi.
1. Khat na ah.. Zomi Namni pen Uk Pi te thuneih na leh Siahtung Siahphei bei ni, Uk Pi te tungpan suahtak ni aa ciamteh ih hih leh Zomi namni ( Zomi National Day) cih theih omlo ding hi. Zomi Suahtak Ni ( Zomi Independence Day) ci leng kituak zawlo ding a hiam?
2. Nih na ah.. Uk Pi te tungpan suah taak ni aa ciamteh a genden ih hih teh Uk Pi te thuneih nanuai ah a om ngei lo..., Asho, Matu, Mara, Mizo ect; te tawh ki nahvawh kha lo ding uh hipah hi. Gtn- Falam Uk Pi ahi Za Hau gambang pen tu lai tak a Falam gam bup hikhinlo, huamkhin lo lai hi. Tua a hih teh Uk Pi te thuneih nanuai ah a om ngei lo ten bangdia CND/ZND ci in bawl dih zen uh hiam?
3. Thum na ah.. Tuni ciang dong mah Uk Pi te gensiat na leh Siahkaih na vai bekbek genbel aa ih neihpen bang ngaih sutna a hihiam?
4. Li na ah.. Tuahun lai aa Uk Pi te Siahkaih genbel a ih neih, tuhun teh Siah nei nawn vetlo, Pia nawn vetlo ih hihiam?
(Ahun, Amun Amual leh tua hun laitak Nuntak khuasak zia et kik huai, ngaihsut huai lo ding hiam?)
Tangthu (History) ihkan aa ihgen leh tuahun laitak leh tuhun laitak huihnundan, nuntak khuasak dan, ki vaipuak zia te ih et kul ding hi.
Minam makai, Panmun nei khat in pen theihhuai telhuai mahmah ta kasa hi.
Feb 20 ni sim in, Uk Pi te thuneih na nuaipan suahtak ni, Siahtung Siahphei bei ni ci in ciltui kaailiang in ihgen khit teh,
Tangtawn a kipan Ei leh Ei ki uk te, namdang te khutnuai leh uk nanuai ah a om ngei lo te hihang ih ci bilbel hi.
Ei leh Ei ki Uk te ci den na pi hang in, ong uk te gensiat leh elbawl in, ih langpan det na pen bang ihdeih ihngaih sut na a hihiam?
Ei mimal mahmah khutsung ah Thuneih na leh Uk na ihneih teh alungkim pan ding ih hihiam?
Kumkhat ah khatvei ihneih ZND/CND ( ZID/CID) ni mipi atam pen ki muhkhop ni sung ah..
Elna, langpan na leh ngaihsut na tomno tawh ki makaih lozaw, kihilh lozaw in, saupi et na ngaihsut na tawh kumtam pi a kimang ding thumaan taktak gen na leh kihilh na in nei leng hoihzaw pek leh namtui zaw ding in kamu ka ngaih sun hi.
Note; Tulai tak aa Te Dim gam ih cih Kam Hau gam Sukte Uk Pi sep hun Kum Zanih (two century) vaal sungah, kuamah thuneih na leh zawhthawh thu tawh a kithat omlo hi. Kam Hau Thukhun tawh kituak in thu a ki khen den a hihi. SiahKaih zong zawhthawh thu tawh akaih uh hi zenzen lo hi( Bang hang in Siah kaai uh cih na kan tek un).
